Многумина од граѓаните кои живеат во Скопје решија да го избегнат карантинскиот викенд во главниот град, па бројни возила во четвртокот се упатија кон туристичките и викенд-населбите.
Меѓу нив беа и политичарите кои решија да го искористат овој продолжен викенд и да го поминат или во родните градови или во природа.
Генералниот секретар на СДСМ, Љупчо Николовски, објави фотографија од Беровско езеро.
„Совет од другарка ми: Оди напред. Полека, но сигурно. Ви посакувам убав викенд и ве поздравувам од преубавото Беровско езеро“, напиша Николовски под фотографијата.
https://www.instagram.com/p/CBDAz0jHz7V/
Претходно тој на фејсбук објави дека секој мора да ги почитува мерките, а исто така апелираше викендот сите да останат дома со своите семејства.
„Секој мора да ги почитува сите мерки – во целост. Тие се основна алатка за намалување на ширењето на заразата. Овој викенд сите да останеме дома со своите семејства. Издржавме и потешки моменти, заедно ќе го поминеме и овој“, стои во објавата.
Покрај генералниот секретар, и градоначалникот на Град Скопје, Петре Шилегов, замина на продолжен викенд во Маврово, објави „ТВ24“.
Шилегов за „ТВ 24“ потврди дека е на својот имот во Маврово, кој го смета за свој дом.
Исто така и потпретседателот на ВМРО-ДПМНЕ, Александар Николовски, откри дека е во својот роден град Охрид, напоменувајќи дека нивната партија била против воведувањето на овој карантин.
Во Скопје има полициски час кој почна во четвртокот во 21 часот и ќе трае до понеделник до пет часот наутро.
