Арнолд Шварценегер ќе се појави во улогата на Дедо Мраз во новиот филм „The Man with the Bag“, кој ги спојува божиќната атмосфера, комедијата и акцијата. Стриминг-сервисот „Прајм видео“ го објави првиот официјален трејлер, во кој покрај холивудската ѕвезда настапува и Алан Ричсон, познат по серијата „Ричер“.
Приказната започнува кога едно непослушно џуџе ја краде црвената торба на Дедо Мраз, со што го доведува Божиќ во опасност. За да ја врати, Дедо Мраз на својот список на непослушни го пронаоѓа Ванс, поранешен крадец кого го глуми Ричсон, и бара од него помош.
Двајцата потоа собираат тим со кој планираат голем грабеж за да ја спасат празничната прослава.
Филмот го режира Адам Шенкман, а во актерската екипа се и Беркли Џејмс, Аквафина, Џејн Краковски, Кен Џеонг, Мајкл Сирил Критон, Лиза Коши и Кајл Муни.
„The Man with the Bag“ ќе биде достапен на „Прајм видео“ од 2 декември.
