Кофеинот може да влијае врз тоа колку се чувствувате смирено или анксиозно, особено ако сте чувствителни на оваа состојка или редовно ја внесувате во големи количества.
Намалувањето на внесот на кофеин со текот на времето кај некои луѓе може да придонесе за поголема емоционална стабилност, но процесот на одвикнување не е секогаш пријатен. Експертите истакнуваат дека кај повеќето луѓе симптомите од одвикнувањето од кофеин го достигнуваат врвот во рок од еден до два дена по прекинувањето на консумацијата.
„Во тој период, кога симптомите на одвикнување се најизразени, поголема е веројатноста за промени во расположението, но тие ќе се ублажат или ќе исчезнат во рок од една до две недели по прекинувањето на внесот на кофеин“, објаснила нутриционистката Линдзи Хол.
Таа истакнува дека во текот на првите неколку дена може да се појават зголемена анксиозност, раздразливост и летаргија, додека одредени хормони и рецептори не се приспособат на новата состојба.
Интензитетот на симптомите може да зависи од неколку фактори, меѓу кои количеството кофеин што претходно сте го внесувале, брзината со која го намалувате внесот и степенот на вашата чувствителност на оваа состојка.
„По долгорочно исфрлање на кофеинот или намалување на неговиот внес, човек може да забележи поголема стабилност на нивото на енергија во текот на денот, бидејќи веќе нема нагли скокови на енергијата поттикнати од кофеинот“, навела нутриционистката.
Луѓето кои се посклони кон анксиозност имаат поголема веројатност да забележат подобрување на расположението по намалувањето на внесот на кофеин.
