Алпинистката Илина Арсова е револтирана од изборот на добитници за државната награда „8 септември“, затоа што меѓу наградените нема ниту една жена. Станува збор за дискриминација на жените во спортот и деградирање на нивните спортски резултати напиша Илина.
„Утрово прочитав вест дека се објавени добитниците на државната награда „8 Септември“. Меѓу добитниците не прочитав ниту едно женско име. Малку истражив и се уверив дека и години наназад меѓу наградените спортисти нема жени. Сепак АМС веќе 7 години промовира „Стратегија за родова еднаквост 2013-2020“. Сите се сеќаваме на 2013 кога АМС направи голема неправда при доделување на наградите „Спортски оскар“, деградирајќи го успехот за искачување на Монт Еверест од прва жена од Македонија. Меѓувреме во понатамошната соработка и поддршка на двете последни експедиции, агенцијата за спорт истакна дека време е да ја поправат грешката направена од тогашното раководство. Оваа година бев номинирана за државна награда, во категорија индивидуални достигнувања, за искачувањето на 7-те највисоки врвови на секој континент, како единствена Македонка и една од 70-те жени во историјата. Па, ме интересира по кој критериум се доделуваат наградите за исклучителен придонес во спортот, афирмација и промоција на Македонија на меѓународен план? Бидејќи јас еве се потрудив да најдам повеќе информации за достигнувањето на добитниците, но не успеав да најдам соодветни резултати, достојни за вакво признание. Од друга страна се прашувам дали има друг спортист од нашата земја за кој најпознатата спортска телевизиска мрежа ESPN објавила статија, или пак некој друг што испишува историја со национални достигнувања во планинарските спортови, во континуитет од десет години? Зарем ОВА НЕ е промоција на Македонија? Ова веќе не е тажно, ова е смешно и патетично. Една од главните пораки на модерниот спорт е „Фер Плеј“. Ова е класичен пример за не- фер игра, дискриминација на жените во спортот и деградирање на нивни евидентни спортски резултати“, напиша Илина на „Фејсбук“.
Илина ги има искачено сите највисоки врвови на сите континенти и е најуспешната алпинистка во Македонија. Таа покрај алипинизот е и сликарка и еко-активистка.
