Тим кинески научници откри дека новиот коронавирус останува во спермата на мажот дури и кога тој ќе почне да закрепнува од болеста. Кинезите ги објавија резултатите од истражувањето во четвртокот.
Тим од болницата во Шангкју тестирал 38 пациенти кои се лекувале таму и кај 16% од нив биле пронајдени траги на коронавирусот во спермата. Една четвртина од нив биле во акутна фаза на заразата, а 9% заздравувале, соопшти тимот.
„Откривме дека коронавирусот САРС-ЦоВ-2 може да биде присутен во спермата на заразени пациенти, дури и кај оние кои заздравуваат“, изјави Дијангенг Ли од Општата воена болница во Пекинг.
Кинеските научници сметаат дека ова не е изненадувачко откритие, бидејќи многу вируси можат да живеат во машкиот репродуктивен тракт. Претходно и ебола и зика беа пронајдени во спермата на пациентите неколку месеци по закрепнувањето.
Сепак, сè уште не е јасно дали коронавирусот може да се шири преку сексуален однос и потребни се понатамошни студии за да се утврди ова.
