Квалитетот на сонот не зависи само од бројот на часови поминати во кревет. Ново истражување спроведено врз речиси 100.000 луѓе покажува дека структурата на спиењето, а особено количината на РЕМ-фазата, може да биде поврзана со ризикот од различни заболувања.
Истражувачите од Медицинскиот универзитет „Капитал“ во Кина анализирале податоци од 95.559 учесници во голем британски здравствен проект. Нивните обрасци на спиење биле следени една недела со уред поставен на рачниот зглоб, а податоците потоа биле споредени со повеќе од 1.000 здравствени состојби. Учесниците биле следени во просек речиси девет години.
Особено внимание привлекла РЕМ-фазата на спиењето, односно периодот во кој најчесто се сонува, а мозочната активност е слична на онаа во будна состојба. Истражувачите утврдиле дека поголемиот удел на РЕМ-сонот бил поврзан со помал ризик од 83 различни заболувања, меѓу кои срцева слабост, Алцхајмерова болест, низок крвен притисок и атријална фибрилација.
Анализата покажала дека различни карактеристики на спиењето биле поврзани со вкупно 156 здравствени исходи. Поголемото количество длабок сон било поврзано со помал ризик од седум заболувања, меѓу кои дијабетес тип 2 и Паркинсонова болест. Од друга страна, нередовниот ритам на спиење бил поврзан со поголем ризик од три заболувања, додека честото будење по заспивањето било поврзано со шест заболувања.
Истражувањето покажало и дека спиењето меѓу шест и осум часа во текот на ноќта било поврзано со помал ризик од значителен број заболувања. Кај луѓето кои спиеле помалку од пет часа, истражувачите забележале поврзаност со поголем ризик од 37 заболувања.
Научниците нагласуваат дека поголемото количество РЕМ-сон не се објаснува само со подолгото вкупно спиење. Според нив, и времетраењето и структурата на сонот можат да бидат важни за здравјето.
Сепак, резултатите не докажуваат дека поголемото количество РЕМ-сон директно спречува заболувања. Станува збор за набљудувачка студија која покажува поврзаност, а не директна причинско-последична врска. Значајноста на истражувањето, меѓу другото, е во големиот број учесници и во користењето објективни податоци за спиењето.
Врз количината на РЕМ-сон влијаат вкупното времетраење и непрекинатоста на спиењето, но и стресот, нарушувањата на природниот телесен ритам и консумирањето алкохол. Количината на РЕМ-сон природно се намалува и со возраста.
Истражувањето е објавено во научното списание „PLOS Medicine“, а авторите наведуваат дека одржувањето на соодветно времетраење и структура на сонот може да има важна улога во зачувувањето на здравјето. За утврдување на точните механизми преку кои РЕМ-фазата би можела да биде поврзана со различни заболувања, сепак, се потребни дополнителни истражувања.
