Музичката легенда Стиви Вондер поднесе тужба против Кармен Џеферсон, која речиси 40 години живее во негова куќа во Холивуд Хилс без да плаќа кирија. Пејачот бара нејзино иселување, откако таа одбила да им дозволи на неговите претставници да влезат во имотот за да ја обноват полисата за осигурување.
Според тужбата поднесена пред судот во Лос Анџелес, Џеферсон живее во куќата со три спални соби од 1988 година, врз основа на устен договор со Вондер, кој ѝ дозволувал да престојува таму без надомест. Таа наводно му била и свршеница на пејачот.
Спорот започнал во јули, кога претставниците на Вондер трипати се обиделе да извршат увид во имотот, но Џеферсон не им дозволила влез. По неколку размени на пораки, адвокатите го раскинале договорот и ѝ дале рок да се исели до 27 август 2026 година. Бидејќи таа не ја напуштила куќата, пејачот побарал судска наредба за иселување.
Вондер бара и 600 долари отштета за трошоците поврзани со ненавременото обновување на осигурителната полиса. Во преписката со адвокатите, Џеферсон ги обвинила за вознемирување и употребила остри зборови, додека неговиот адвокат ги отфрлил обвинувањата.
