Раперот Марко Маринковиќ – Слаткар, на 41. издание на фестивалот „Макфест“, испрати силна порака за разбирање, трпеливост и поддршка на луѓето кои имаат проблем со говорот.
Наместо да се претстави со песна, Слаткар од големата фестивалска сцена одлучи да зборува за сопственото искуство со пелтечењето и за тоа колку е важно луѓето да бидат сослушани, без прекинување и осудување.
„Оваа вечер не сум овде за да пеам, тука сум само да ги потсетам сите оние што имаат проблем со говорот дека не се сами“, порача раперот.
Тој објасни дека музичкиот ритам му помогнал полесно да се изразува и да ги пренесе своите мисли.
„За мене музичкиот ритам не значи слава, ниту популарност. Мене ми помага да земам здив и да го кажам тоа што го мислам“, истакна Слаткар.
Посебно се осврна на односот кон луѓето кои пелтечат, упатувајќи апел до публиката да има повеќе разбирање и трпение.
„Доколку сретнете човек што има уникатен говор, како што имам јас, сакам да го сослушате, да го оставите да го каже тоа што го мисли и да не го прекинувате. Можеби треба многу малку време за да чуете нешто што е многу важно“, порача тој.
На крајот, Слаткар ги повика присутните да бидат трпеливи и солидарни, потсетувајќи дека и луѓето кои имаат потешкотии во говорот имаат многу што да кажат.
Со својот искрен говор, раперот ја искористи големата сцена на „Макфест“ за да испрати порака која ја надминува музиката – дека секој заслужува да биде сослушан.
